Movimento per l'adozione ambientale della laguna davanti San Giuliano        

" NO RESTA CHE EL MOSE ..."

(dito dal sindaco Costa el 6/11/2000)

   Nei giorni passai e alte maree

fasseva noare pae cae e pae piasse

penseve... anca e toe de e passerèe…

no solo i sorzi e i sacheti de scoasse

   Tre pori autisti schissai in tangensiae

ga fato capire ancora na volta

che… tunnel  o "bivi" o passante stradae

sta grana al più presto ga da esser risolta

   Spostandose a ovest, a Porto Marghera,

dee volte 'e nave 'e xe grande: no ‘e passa:

el canal dei petroli coa melma el se intera…

solo pae  cape va ben l’acqua bassa…

   Da on tòco a Venessia e partuto,  mi sento

che in tanti i se âgna de sto moto ondoso…

Sarà i pai marsi…sarà anca el vento…

Pa’ on verso o par l’altro e rive va zozo…

   I mai de Venessia i xé na caterva,

 ne parla ‘a stampa e anca la xente,

ma go l’impression che proprio no serva

parlarghene tanto e sempre par gnente…

   Ghe vol dele idèe; xe quele che conta...

pensar difarente…co le alternative

par farsene on bafo del mare co 'l monta

par salvaguardar i palassi e le rive…

   In meso a tuti che accusa i ritardi

me  sento speciae…e on po'  na eccession:

mi no me a ciapo contro i “bastardi”

che ancora i rimanda e risolussion

   parché par la testa me frula na idéa

e adesso la scrivo pa ‘a xente comune…

pol darse che a piasa e i la trova anca bèa

parfin i siensiati e i pieni de acume..

   Prima de dirvea però ve averto:

xe 'e fogne, i concimi che fa inquinamento,

xe l’acqua stagnante, e fabriche, certo...

e no i murassi, l’acciaio, e 'l cemento

   L’intera laguna xé on piano inclina’

dove a marea a deventa più  granda

no quando coe dighe te disi “alto là”

ma co ti ghe lassi che a cressa e 'a se espanda…

   Me buto...ve 'o digo…sarò scandaloso:

on solo progeto par eliminare

i guasti del porto e del moto ondoso,

el trafico a Mestre, a paura del mare…

   Da'a zona del Piave se fa derivare

passando pa Jesolo e fin a Treporti

na nova arteria dee spiage e del mare

che elimina e coe e forse anca i morti.

   Da Punta Sabbioni, al posto del MOSE

a strada a xe diga a tuti i efeti:

de sora ghe pasa anca auto lussuose,

de soto al massimo i vaporeti

   A strada continua, de soto o de sora

de qua del Nicei o de là verso el mare

verso Ma'amoco sta arteria vien fora

e ‘a xe fin Fusina na translagunare...

  ...magari seguendo el canal dee navi

o andando co on ponte alla gran idrovia

saria risolto anca el nodo dei scavi

se quea grand’opera andasse finia…

   In pratica ghemo do grandi bacini,

 non più na laguna “com’era e dov’era”:

uno par barche barchette e barchini,

l’altro per carghi e par navi-crociera…..

  Chi xe che se opon? El xé ‘l ministero?

El xé in tre parti anca Dio-Trinità:

qual  xé el problema o ‘l grande mistero

de una laguna e de do metà?…..

  El ricambio de l’acqua? No problem ne’ intopi!

Tut'altro: anca Mestre ghe guadagnarìa…

Ti  verzi so on lato, dall’altro ti stropi…

dee porte vinciane par mi bastarìa…

                            Tito Pamio

ASSOCIAZIONE CANOISTICA ARCOBALENO – c/o Pamio Tito e Olivieri Carmela – Via Bagaron, 42/1 – 30030 – Campalto – Venezia-Mestre

Tel.: 041 900591 - E-mail: pamio@inwind.it